'A ARA !

20 21 7. Nā Māmahu fa'ahou ānei ? E Te Ari'i-o-te-Ra'i Lani ē, penei a'e, 'ua mo'e noa teie nā tauiha'a ? O te reo marū ia 'o Tefati. - 'Aita i mo'e, 'ua 'eiāhia ! 'O te reo te'ote'o ïa o Te-Ari'i. 'Ua 'eiāhia tā'u « IPod », nō Lax roa mai, 'eiaha ia mo'ehia ia 'outou ! - 'Ohipa ïa nā mātou Lax ! Te reo fa'ao'ō'o ïa a te mau tama. - 'Ua 'eiāhia, nā teie « bandit-voleur » 'o Māmahu ! 'Ē, e 'ua pāpū ato'a iā 'u, nā Māmahu ato'a i 'eiā i tā 'u uāti ! Ta'u atura 'o Temata. - Fa'aātea ia 'oe, e Te ari'i ē ! Mea 'ohie 'oe i te pari-noa-ra'a ia Māmahu ! - 'Ē, mea 'ohie ! Nā tō 'oe hoa 'o Māmahu i 'eiā ! E 'āpiti ihoā te ta'ata 'eiā i te ta'ata 'eiā ! 'Ua huru 'ē roa 'o Temata i teie parau. - 'Ua 'eiā 'ōna i tā 'u « IPod », 'ua 'ite pā'āto'a tātou… 'Ua 'eiā ato'a ïa 'oia i tā 'u uāti. E'ere ānei ? Temata… ? Pāhono atura teie. - 'Eiaha e rū ! 'Ua parau 'oe, 'ua 'eiā 'o Māmahu i te « IPod ». 'E 'ua 'ite pā'āto'a tātou ! Nō te aha ïa 'ōna i 'eiā fa'ahou ai i te uāti ? Tē tāmoemoe nei te tā'āto'ara'a o te ta'ata iāna. - Nō te nounou ! 'Ē, tē parau nei au nō te nounou ! Inaha, teie uāti, e'ere i te uāti pa'a vī 14 ! I 'ohihia i roto i te 'āfata pu'a ! E uāti moni rā teie ! Nō « Genève » roa mai, i te fenua Herevētia. 'Aita 'outou i 'ite… ! Huti a'era Te Ari'i-o-te-Ra'i Lani i tōna aho, mai te mea ra ē, e ari'i ihoā 'ōna. - 'Ia 'ite mai 'outou, 'aita te nounou i roto iā'u ! Nō reira, Māmahu iti ē, 'a tāpe'a atu i teie nā tauiha'a ! E'ita vau e hina'aro fa'ahou ! ' 'Ua vi'ivi'i roa i tō 'oe rima repo… 'A fa'aho'i noa mai i te moni… Riri, rere, rara atura 'o Kuriri i teie parau 'āpī. Pūpuni ihora 'o Kaveu. Tē hōhoni nei 'o Māmahu i tōna 'utu. Hōhoni 'ia puta ! Hōhoni 'ia pūtoto ! Tē pātītī ato'a nei te 'āvae nō te 'ōu'a i ni'a i te tahua. Tē pa'ari nei te rima. Inaha, 'ua tāhiti roa 'o Māmahu… 14 E'ere i te uāti ha'apa'ora'a 'ore, e uāti moni ra.