'A ARA !

24 25 8. Tē ha'avāhia nei 'o Mamāhu. Huri atura te aro o te mau tama i ni'a ia Temata. Tē hina'aro nei rātou 'ia fa'ahiti 'oia i tōna mana'o. Heheu ihora 'oia i te faufa'a o te parau. Nā te parau e fa'aora. Nā te parau ato'a e ha'apohe. Penei a'e, e riro mai paha 'oia, 'ei pāruru i te tiripuna nō Papeete. Ta'uma a'era 'oia i ni'a i te 'aira'a mā'a 'e te rā'au i te rima 'ia 'itehia 'e 'ia fa'aro'ohia mai 'oia e te tā'āto'ara'a. I reira, hi'o atura 'oia ia rātou, parau atura : - E'ere 'o Māmahu i te ta'ata 'ino, 'ua 'ite pā'āto'a tātou. 'Ua horo tātou i hea e ani ai i te tauturu ? 'Ua horo tātou ia Māmahu ra ! Nā vai i huti mai i te pātete teiaha mai roto mai i te 'āpo'o pape ? Nā vai ? Nā Māmahu ! Nā vai i 'unahi i te i'a 'ia 'ore tō tātou rima 'ia puta ? Nā vai ? Nā Māmahu ! Nā vai i 'ana i te 'ōpa'a 'ia 'amu tātou i te 'īpō ? Nā vai ? Nā Māmahu ? 'Ē, nā Māmahu noa te mau 'ohipa pa'ari i rave ! Tā tātou, te fa'anehenehe-noa-ra'a ïa ! Tē 'ōhumu nei rā 'o Te Ari'i mā… 'Ē, parau mau ! Nō roto mai 'o Māmahu i te tahi fare ha'api'ira'a ta'a'ē. Te tumu, 'ua pohe tōna māmā 'e 'ua fifi tōna orara'a ! E'ere ïa i te « Bandit-Voleur »… Riri, rere, rara atura 'o Kuriri i teie parau 'āpī. Pūpuni ihora 'o Kaveu. Tāpūhia atura te parau a Temata. - 'Ē, e'ere paha i te « Bandit-Voleur » ! E « Voleur-Bandit » rā ! Tē fa'ahapara'a ïa a Te Ari'i-o-te-Ra'i Lani. « Voleur », nō te mea, 'ua 'ite tātou pā'āto'a, 'ua 'eiā 'oia i tā'u « IPod » ! Maumau 'ore te reo 'o Māmahu nō tōna riri fāito 'ore. - 'Aita vau i 'eiā noa a'e i tō'u orara'a ! 'E 'ua nava'i roa vau i te fa'a'ino-noa-ra'a-hia ! 'A haere mai e Te Ari'i-o-te-Ra'i Lani ! ' Eiaha e tāponi ! 'A haere mai, e tarai au ia 'oe !