'A ARA !

30 31 I te reira ihoā taime, 'ahehe maira te uru fara… Māna'ona'o atura rāua i te 'ahehe tā te Ari'i i fa'ati'a a'e na… - Iaaa ! E'ere ānei terā te 'ahehe tā te ari'i i fa'aro'o ? Ha'apae ihora nā tamari'i nei i te horoira'a pāni. Fa'ahe'e marū noa atura rāua ma te toro i te tari'a. Nu'u atura i teie 'ahehe. Tae atura rāua i te 'ūputa o te tahi 'āpo'o… 'āpe'e noa atura te mau tama. - E horoira'a pāni tā 'ōrua i roto i te 'āpo'o ? O te hō'atara'a ïa a te mau tama. 'Aita e pāhonora'a ! Toro atura 'o Temata i te upo'o i mua i te 'āpo'o, e 'ohipa teie e 'anapa nei… Noa atu te ri'ari'a, tānao atura 'oia… e tīte'amata ! Tānao atura 'o Māmahu… e « IPod » ! - E'ere teie taua « IPod » ra nō Lax ? 'Oia, 'ua fārerei te tahi ! I te reira taime, I te mata marū o te mārama, I te motu ra nō Napuka, I te pārora kahaia, 'Ua ruru 'o Tefati, te fa'atere o teie pū, i te tā'āto'ara'a o te mau tama. Parau atura 'oia : - E te mau tama, tē fa'a'ite nei au i tō'u mana'o tātarahapa : 'ua hape au. 'Ua fāri'i noa vau i te mana'o 'e te peu hape o te tahi. 'Aita vau i tuatāpapa māite i te parau mau. Nō reira, e Temata 'e 'oe e Māmahu, 'a fāri'i mai i te tātarahapa… Fāriu atura 'o Tefati, ma te parau ia Te-Ari'i-o-te Ra'i Lani : E 'oe, e aha tō 'oe mana'o ? 'Ua tīa'i maorohia… te pāhonora'a. Muhumuhu ihora tōna reo mai roto i te pōiri. - E 'o vau ato'a. Tē tātarahapa nei au i mua ia 'outou e tō'u mau taea'e. 'Ua hape au i te pari ha'avarera'a ia 'ōrua. Tē maere nei te mau tama. Tē tātarahapa nei au i tō 'u te'ote'o, Tē tātarahapa nei au i tō 'u 'ino, I tō'u fa'a'ino tu'utu'u 'orera'a ia 'oe Māmahu… Māmahu ē, Māmahu ē… fa'a'ore mai i tā 'u hape. Pi'o ihora te mata. Ta'i a'era 'o Kuriri. Tahe maira te roimata. Nu'u atura 'o Māmahu i mua, Tauahi atura 'oia ia Te-Ari'i-o-te-Ra'i Lani. Hurō a'era te tama ! Hurō a'era i te aroha ! Ta'i atu ra 'o Kuriri i te hau ! 'Ata'ata atura 'o Kaveu !