'A ARA !

2 3 Horo atura te mau rautī i rāpae. - E aha teie ? - E aha teie ? - 'Ua 'eiāhia tā'u «iPod», 'o te reo ta'i ïa o Te-Ari'i-o-te-Ra'i Lani ! Tā'u « iPod », nō « Lax » roa mai ! - 'Ua 'imi 'oe i roto i te fare 'ie ? 'O te anira'a ïa a Tefati, te fa'atere o teie pūhapara'a. - 'Ē, 'ua vaiiho vau i 'ō nei ! - I hea roa, 'a fa'a'ite mai ! Tē pe'ape'a nei 'o Tefati. - I 'ō nei, hu…hu…hu…, ( tē ta'i nei te tamaiti), I pīha'i iho i tō'u tūru'a ! 'A hi'o na, 'aita fa'ahou ! Pāheruhia atura te fare 'ie. Huehia atura tāna mau pūtē 'ahu. Tāorahia atura te 'ahu ta'oto i rāpae. 'Aita iho ā e « iPod » ! Ta'i atura te hio, parau riri atura te fa'atere : - E te tama, ha'ape'epe'e mai i rāpae ! 'A haere mai i mua iā'u ! 'A tīfene i te rima ! 'Eiaha e ha'uti fa'ahou ! E fārerei 'outou iā 'u ! Fa'aue atura 'oia 'ia pāheruhia te tā'āto'ara'a o te mau fare 'ie. 'Aita ato'a i 'itehia ! Fa'aue atura 'oia 'ia pāheru-ato'a-hia te mau pūtē. 'Aita ato'a i 'itehia ! Ta'i atura 'o Te-Ari'i-o-te-Ra'i Lani mai te pēpe ra te huru : -'A fa'aho'i mai i tā'u « iPod », e fa'a'ite au i tō'u māmā ! Pahō atura te mau tama i te 'ata. Inaha, tē auē noa ra 'oia ma te 'ōu'au'a 'e ma te tāpō i te mata. Noa atu ā te vaha rahi, 'aita rā e roimata. 'Ē, 'oia mau, o te huru ïa o Te-Ari'i-o-te-Ra'i Lani. Terā tamāroa, nō roto 'oia i te tahi 'ōpū fēti'i 'ona 2 . Terā pa'i pupu ta'ata fa'a'oru 'e te mā'iti ta'ata. 'E nō te mea, 'ua fānauhia 'oia i te piha terevete 3 , 'ua rau ïa tāna mau ha'uti. 'E nō te mea ē, e tama 'ōtahi ho'i, 'ua rau ato'a tāna mau peu… 'E mau peu 'ino fāito 'ore ana'e, i fa'aoti ai te metua tāne e fa'aātea ri'i iāna ia Tahiti. I tāpa'o ai 'oia i tōna i'oa i teie pūhapara'a i Napuka nei. Teie rā, 'ua tari ato'a mai 'o Te-Ari'i-o-te-Ra'i Lani i tāna mau ha'apahira'a i te motu nei. Te mea ïa e fa'atupu nei i te māna'ona'ora'a 'e te hō'atara'a i roto ia Temata 'e tōna hoa 'o Māmahu. 2 Feiā moni 3 Piha moni : e metua 'ona tō TAOTRL