'A ARA !

4 5 2. Te parira'a. - Nā Māmahu i 'eiā i tā'u « iPod », 'o te parira'a ïa a Te-Ari'i-o-te-Ra'i Lani. Riri, rere, rara atura 'o Kuriri i teie parau 'āpī. Pūpuni ihora 'o Kaveu. Huehue a'era te ta'ata, tūtonu atura ia Māmahu. - 'Ē, nā Māmahu ! 'Ua 'ite au iāna i te tāmoemoe-noa-ra'a iā'u inanahi ra ! 'Ua vai muhu 'ore noa rā 'o Māmahu i mua i teie fa'ahapara'a. Tā'iri'iri noa atura 'oia i te upo'o, i reira tō Temata pāto'ira'a ē : - Ha'avare ! 'Ua 'ite mata 'oe iāna i te 'eiāra'a i tā 'oe « iPod » ? 'Aita ! - 'Oia ! Nāna i 'eiā ! Te pāhonora'a ïa a Te-Ari'i-o-te-Ra'i Lani. - 'Āhani, Māmahu ! (E fa'ao'ō'o teie). Tā 'oe fare ha'api'ira'a, e'ere ānei terā i pāheruhia ? I te hepetoma i ma'iri a'e nei…nā te mau mūto'i ? Uhm, e'ere terā i tomohia, i tū'āhia 4 ? E'ere ānei te fare ha'api'ira'a o te mau «bandits-voleurs» ? 'Āhani, teie fare ha'api'ira'a, e'ere… ? Hahaha ! E aha nei te i'oa… ? 'Ū'ū noa atura 'o Māmahu, 'ua ha'amā roa 'oia. fenefenea 'o Te-Ari'i-o-te-Ra'i Lani i te 'ata. - 'A ha'apāpū pa'i i te parau ! 'Eiaha e 'ū'ū noa ! E mā'ino'ino rahi tō Māmahu. Te rima, 'ua 'ōmenemene roa ïa… - 'A fa'a'ea na i te fa'ao'ō'o ! Fa'aro'o mai, 'o māua noa 'o Māmahu inanahi ra i te tāmāra'a i te 'āua e pō noa a'era. Nō reira, i tāua taime, 'aita 'oia i 'eiā… ! - Parau mau, Temata, te reo ha'avarevare ïa 'o Te Ari'i-o-te-Ra'i Lani, ' aita ihoā ïa i 'eiā ! 'Ua hape noa rā te rima i te ravera'a ! 'Aua'a te rima 'o Temata i tāpe'a mai ia Māmahu, i 'ore ai 'oia i papa'i i teie nei vaha repo. 4 'Ua rave 'inohia.