'A ARA !

6 7 Toro atura 'o Te Ari'i-o-te-Ra'i Lani i te hō'ē tīa'a varavara, 'ia 'ite te tā'āto'ara'a. - 'Ē, 'oia mau, tē ha'apāpū nei au e tamari'i 'eiā ihoā 'o Māmahu. Taha atura te mata i ni'a i te 'āvae 'o Māmahu, hō'ē noa tīa'a i te 'āvae… - I mua noa i tō' u fare… I teie po'ipo'i… I tō'u arara'a mai, teie ia mea ! 'O vai te fatu ? 'O vai… ? He'e marū noa atura te mata 'o Te Ari'i-o-te-Ra'i Lani i ni'a i te tīa'a, ma te tai'o pūai : « Mā…Ma… E reo 'āmui o tei pāhono atu : - Māmahu ! Iaa, 'o Māmahu ā ! ! ! Iaa, « bandit-voleur » ihoā ! Tama'i atura te fa'atere : - Māmahu, e fa'aea noa 'oe i tō fare 'ie, e tae atu i te taime e fa'aho'i ai 'oe i te « iPod ». Tē fa'aro'o mai ra 'oe ? Mutamuta noa ihora 'o Māmahu : - Um ! Nā reira… 'Ata'ata a'era 'o Te-Ari'i-o-te-Ra'i Lani nō te mea 'ua fa'autu'ahia 'o Māmahu. Riri, rere, rara atura 'o Kuriri i teie parau 'āpī. Pūpuni ihora 'o Kaveu. 3. 'O te Ari'i-o-te-Ra'i Lani ānei ? Tē riri nei 'o Temata ia Te-Ari'i-o-te-Ra'i Lani. E ari'i 'ohipa 'ino mau teie ari'i, Te-Arii-o-te-Ra'i Lani… Inaha, 'a piti taime tōna tōtōāra'a ia Temata. Te taime mātāmua, i te hō'ē po'ipo'i, 'ua hitimahuta te mau tama i tōna reo i te tuōra'a ē : - E 'ahu teie, e 'ahu teie e pāinu nei ! 'Ua tāpapa te mau tama i te tairoto. 'Ua mana'o rātou ē 'ua pāinu paha te tahi 'ihitai, 'aore rā, 'ua tomo te tahi pahī i te ava… - Nō vai rā teie 'ahu ? Te ui māerera'a ïa a Tefati tāne. Nō vai… ? 'Eiaha tātou e 'imi, 'o Temata te fatu o teie 'ahu. 'O Temata ato'a teie i 'ati na i te 'ahu rari. Nā vai rā i tāora i roto i te miti ? Nō Temata rā, hō'ē noa ta'ata, 'aita atu ai.