NA MAEHAA NO FAAA

21 ’E i uta roa i roto i taua fa’a ra o tei parauhia i muta’a ra o te fa’a o Ata’aroa tö räua matera’a e nä te ne’one’o o tö räua tino i tahe mai i roto i te tahora e fa’a’ite i tö Tefana ë, ’e ’ua pohe te ’aito rätere nö Raromata’i mai, parauhia atura taua tahora pape ra ’o Vaihau’a ’oia ho’i o tä tätou ato’a e parau nei ’o Papehau’a. ’E ’ua riro ’o Hauiti mai tahito mai ’ei täpa’o nö te heva, e mou’a nö te heva, e täpa’o mure ’ore nö tö Tefana ta’ato’a. ’Äre’a te värua o nä maeha’a ’ua reva atu ï a i te ’ötu’e nö Tata’a, ’e mai reira ho’i atu ai i te pö i Havai’i te vähi nö reira mai räua i Rohotu No’ano’a.