TAFAI

5 U a rau te fifi i fä mai i roto i te tau o töna 'äpïra'a 'e pa'ari mai ai, tei tohu i te hö'ë orara'a ta'a'ë 'e te fa'ahiahia nö Täfa'i 'ämuri a'e. Nä taua mau fifi ra i ha'apäpü maite i töna 'ite 'ohie 'e i töna märamarama rahi. 'A taure'a mai ai, 'ua rave 'o Täfa'i i te mau 'ohipa maere tei fa'a'ite päpü i tei mana'o-ätea-a'ena-hia. 'Äre'a i töna tua'ana ra, 'ua vai 'oia 'ei ra'atira noa, 'ei ta'ata noa, tei morohi te parau nö te ro'o rahi o töna teina. E ta'ata tino rahi 'o Täfa'i 'e te päutuutu ho'i : e atua. E rouru tea töna 'e te hinuhinu, e mata hiri 'e te 'ara'ara, e rima ra- rahi 'e te püai, 'e, e mai'u'u roa 'e te 'oe'oe. E rahi a'e 'oia i te mau ta'ata ato'a, inaha, tei te pa'ufifi noa rätou iäna. E au i te marumana 'ia haere iho, 'e, e mau roa töna tapua'e i te vähi täna e ta'ahi ra, tae noa atu i te vähi pa'ari roa a'e. 'Ua tui töna ro'o i te fenua ato'a nö töna pa'ari 'e töna 'ite. 'Ua riro 'oia 'ei ta'ata 'aravihi i roto i te mau ha'a ato'a e räve’a na i taua tau ra. Nö töna itoito 'e töna maita'i rahi i here 'e i fa'aturahia ai 'oia e tö TA- HITI pä'äto'a, 'e, mä'itihia atura e te nuna'a 'ei ra'atira nö te mau toa, 'oia ho'i, 'ei Toaupo'otü. ’