TE TERE O RATA

15 Te fe'e Pa’a’ina fa’ahou a’era te reo ’o Punua : - E Rätä ! Të ’ärepurepu nei te miti ! E tuputupua teie i mua ia tätou ! I reira te pahï i te ’opa’opa-püai-ra’a, ’e, i fäura mai ai te tahi mau aveave rarahi mau mai roto mai i te moana. Mai te ’äma’a rä’au ra te huru o te pahï o Rätä. ’Oi tahuri te pahï e rave rahi taime ; ’ua ’ati roa ho’i i te mau aveave fe’e. I reira tö Punua harura’a i te ’ömore, ’e, pätia atura i roto i te pü o te fe’e. Pohe tä’ue ihora ’oia, matara a’era te aveave e fa’a’ati ra i te pahï, ’e, mo’e ’ë atura te fe’e ra i roto i te moana pa’o. Ora maira ’o Rätä mä, mai roto mai i teie fifi, ’e fano fa’ahou atura.