TE TERE O RATA

17 Te tohorä Reo fa’ahou maira ’o Punua mai te reimua o te pahï : - E Rätä ! E i’a iti rahi teie. E tohorä, e ti’a pa’i ! ’A piri mai ai te tohorä, hämama a’era i töna vaha : mai te hö’ë ana rahi ra te huru, ’o të horomi’i atu i te pahï o Rätä. E auë te auë a te mau ta’ata i ni’a i te pahï. Mau a’era ’o Punua i täna ’ömore, ë, tïto’o atura ’oia i te vaha o te tohorä. Hämama noa atura töna vaha, e’ita e piri fa’ahou. Tomo atura ’o Punua i roto, ha’amäineine atura i te ni’ara’a o te vaha… Ma’itihe ihora te tohorä : pe’e a’era te pahï nä ni’a i te ’iriätai, ’e, iri atura i tahatai. I te topara’a te hau i ta’a ai ia Rätä ë, ’ua tae rätou i ni’a i te fenua täna i onoono noa na i te ’ite.